مكسوف ، يا رسول الله

كتبت هذه القصيدة فى 12 ربيع 1420فى وقت كنت فى أشد الحاجه الى البكاء بين يدى رسول الله صلى الله عليه وسلمونالت من الشرف الرفيع ما لم تنله غيرها فقد آلقاها الراحل الأخ محمد المليجى امام قبر رسول الله وهو يبكى ويبكى من حوله ونشرت كثيرا بمصر وخارجها وما زلت أعجز عن كتابة مثلها رغم ما حوته من بعض هنات عروضيه رفضت تماما الاستجابه لكل البدائل الصحيحهوأرجو من الله أن يتقبلها فى ميزان حسناتى وأن يحببكم فيها 00 أمين




من أغانى حرفوش المجذوب




مـكــســوف






صلى الله عليه وسلم


مفتتح


ولد الهدى



فالكائنات فرحت قوى



واستبشرت فى الأرض خير



غاب الهدى



فالكائنات حزنت قوى



مافرحش غير



إبليس وأعوانه اللئام



أصل اللجام



أصبح فى ايد نسيت تسابيح ربها



وف قلبها بركان هوى



بيزيد إذا زاد النوى



بينها وبين نور الكتاب



ولدى الهدى 00 غاب الهدى



القصيدة



مكسوف 000



مكسوف ووشى فى الأرض منك يا رسول الله



إيه راح اقول يوم مولدك



وأنا اللى هاجر سنتك



ولا أستحق 00



انى أكون من أمتك



يارسول الله




صلى الله عليه وسلم




الإسم ناصر000



أى نعم!!



لكنى مهزوم منكسر



وف قلبى شلال من وهن



لو قلت يوم انا هانتصر



بيشدنى



ويقول لي حاسب كن حذر



مكسوف 0000



مكسوف ووشى فى الأرض منك يا رسول الله




صلى الله عليه وسلم




مخنوق أنا



مخنوق قوى



حال العباد بقى مش قوى



فوق الضعيف بيدوسوا مليون مفترى

والرحمه هربت م القلوب


ووراها فرعون المعاصي وجيش ذنوب



الرحمه طالبه المعجزه



طوق النجاه



فينك يا نوح



فين السفين



يا موسى فين بحر الإيمان وعصى اليقين



فينك يا غار سيدنا النبى



دى الرحمه طالبه المعجزه



فينك خيوط العنكبوت



فين اليمام



دا ابوجهل سالل سيفه متخفى بغمام



يدعى لدين الانهزام



يدعى لدين فيه الجسد هو الإمام



وإلهه قالوا العم سام



والسام دا سام



السام دا سام!!!!



السام دا سم بيجرى فى عروق الوطن



أكل الجميع م الشاه ولا حدش فطن



مكسوف 0000



مكسوف ووشى فى الأرض منك يا رسول الله




صلى الله عليه وسلم




مخنوق أنا



مخنوق قوى



أصبحنا إيه



أصبحنا دوره للمياه



وفك زنقه للطغاه



ويهينوا دينا نبينا



وبيطمعوا فى صمتنا 00 فى ضعفنا

ويحددوا نوع العقاب


ما احنا الجناه



واحنا اللى جبناه لنفسنا



أصبحنا حائط مبكى بس الدمع لينا



أصبحنا حيطه ومايله سدت نور عنينا



فلا عدنا شايفين الطريق



ولا عدنا حاسين بالحريق



ولا عاد لسانا بيحتمى بنور الكتاب



فهيعمل ايه



لما يحاول يشتموك حبة كلاب



غير انه يرفع دعوته



اللى فى قرارة نفسه عارف إنها مش تستجاب



فلا هو طيب مطعمه



ولا أخلص النيه



وتاب عن مأثمه



أصبحنا ايه



أبدا ما اصبحناش



أمسينا دوما والمسا طول علينا



مكسوف 0000



مكسوف ووشى فى الأرض منك يا رسول الله




صلى الله عليه وسلم




مخنوق أنا



مخنوق قوى



نفسى الدموع السجينه



ما بين حيطان المعاصى



تهرب على الخدين



تعبر جبال القسوه جوايه



وتغسلنى تطهرنى



وقلبى ينشطر نصين



ويجى م السما ملكين



وياخدوا الهم ويا الشر من قلبى



ويزرعوا بين الضلوع آيتين



نفسى أكون تابع انا لسدنا النبى



آآآآآه يا نبى



لكن إبليس اللعين



بوظ قلوب المسلمين



محتاجه تانى تنجلى



محتاجه تانى تتغسل



محتاجه تانى تتكسى بنور اليقين



مكسوف 000



مكسوف 000



مكسوف 000



مكسوف ووشى فى الأرض منك يارسول الله




صلى الله عليه وسلم






من أشعار/ ناصر صلاح



حرفوش المجذوب