أنا مش صغير

موضوع: أنا مش صغير الثلاثاء 16 نوفمبر 2010, 3:31 pm

أنا مش صغير
شعر/ السيد جلال

أنـا آه صغــــير لكني عــــارف
أكــتر وأكــــتر وببقى خايـــف
أحكى وأفضفض لتقولوا خايــب

وتعذبـــــــــونى أو تحرمـــونى
عشان بحاكـــى أطفال زمانــى
وان قلـــت :لأه تقولوا :عايـب

وأضـطر أسكت واحلف وأكدب
والعقل يخــرس ماعدش يحسب
وابقى البلــــــيد وابن المصايب

أنا مش صــغير وعقلي نــونــو
وأقــــدر أفكـــر ف كتير واصونه
لو تسألونــــــى ح أقول واجــاوب

ومسيري ح اكبر وعقلـــــي يكبر
لو تشركونــــى ح اعرف أعـبر
عن رأيـى أكتر وح ا بقى نايــب

وأسال بإسمــــك عن كل حاجتك
واشرح واناقش أكبر مشاكـــلك
وصوتنا يعــلى ويبقى صايــب

وبكره طبـــــعا ح ابقــى مكانك
واعمل عمايـلك لو آن أوانـــــك
وابــنك وغـيره زرعك وطـايب

أستاذي قلـــــي شوقي واخـدنى
أسمــــع كلامك وتـــــشد ودنى
علمك يــــفدنى حاضـر وغايب

أنا مش صـغير د انا غصن أخضر
لو يوم يمـــــيل أو يبقى أصــفر
تقل قيمـــــــته بين الحبـــــايب

الله عليك يا استاذ
كلام جميل بس الصورة مالهاش علاقة بالكلام

ربما من منظور قريب
أشكر لك اهتمامك

الكلام جميل بس حاسة زي ماتكون إنت اللي عاوز تقوله بس بتقوله على لسان "الطفل الصغير" أو حاسة إنك عاوز ترجع تاني صغير "طبعا في السن مش المقام" تبعد عنك مسئولية الكبار وتلاقي اللي شايل همك ومسئوليتك بس مش حينفع فالمسئولية دي منذ نعومة الأظافر.
واسمح لي:
"ماعدتش" مش حينفع تمشي إما تكون "ماعدش يحسب" أو تكون "ماعدتش أحسب" أنا متهيألي كدة.
ثانياً: " أنا قش" محتاجة تكون على بعضها "أناقش".
ثالثاً: "قمته جاية من القمة فمتهيألي برضه لازم تكون "قيمته""
وأرجو أن تتقبل مني هذا ولك جزيل الشكر

زمان قالوا "ولا كل من ركب الحصان خيال"
وأنا دلوقتي باقول "مش كل من مسك قلم بقى كاتب"
ولا كل من قال كلمتين موزونين بقى "شاعر"
فهي بالفعل:

أشكرك على التعليق
لا يمكن اعتبار من قال رأيه متطاولا
خاصة أنه يشير إلى أخطاء وقعت عند كتابة النص
وذلك يعتبر في صالح النص والمبدع وليس ضده
فما بالك لو كان النقد موجها بشكل فنى للنص وليس شكلى
مؤكد ستكون الفائدة أكبر
وهذا ما آمل أن أراه: النقد الفنى وكذلك الشكلى الإيجابي والبناء للنص
فهذا يعنى أننا نقوِّم أنفسنا ونحن في الطريق الصحيح
والحقيقة النص من مواليد 24/12/1996
ولم أكن حينها أمتلك جهاز كمبيوتر وكتب النص لي صديق من مدرسة الوايلى
ولكن هذا لا يعفينى من ضرورة مراجعة النص
أكرر شكرى وتقديرى

» طلب صغير ممكن ؟؟؟؟؟؟؟؟؟؟؟